ಈಶ್ವರಪ್ರಾಪ್ತಿ ಸಮಸ್ತ ಮನುಕುಲಕ್ಕೆ ಪ್ರಾಪ್ತವಾಗಬೇಕು. ಅದಕ್ಕೆ ಹಠಯೋಗವೇ ಮಾರ್ಗ ಎಂದ ಗುರು ಮಚ್ಚೇಂದ್ರನಾಥರು ಇಲ್ಲಿ ಅನೇಕ ತಪೋಕ್ಷೇತ್ರಗಳನ್ನು ನಿರ್ಮಾಣ ಮಾಡಿ ತೌಳವ ಪರಂಪರೆಯನ್ನು ಗಾಢವಾಗಿ ಪ್ರಭಾವಿಸಿದರು. ನಾಥ ಪರಂಪರೆಗೆ ಸೇರಿದ ಕದ್ರಿ, ಧರ್ಮಸ್ಥಳ, ಕುಂಬಳೆಯ ಪೊಸೋಡಿ ಗುಂಪೆ, ವಿಟ್ಲ, ಕೊಡಚಾದ್ರಿ, ಕಮಲಶಿಲೆ, ಮಂಗಳಾದೇವಿ ಸೂಡ. ಹಲವರಿ ಮಠ ಎಡಮೊಗೆ ಮೊದಲಾದ ಕ್ಷೇತ್ರಗಳು ನಮ್ಮ ತುಳುನಾಡಿನಲ್ಲಿವೆ. ಕಾರ್ಕಳ ತಾಲೂಕಿನಲ್ಲಿ 8 ಮತ್ತು 9ನೇ ಶತಮಾನದಲ್ಲಿ ನಾಥ ಪರಂಪರೆಯ ಪ್ರಭಾವ ಕಾಣಿಸಿತು. ಆಗ ಇಲ್ಲಿನ ನಗರದ ಪ್ರಮುಖ ಗಿರಿಯಾಗಿರುವ ಪರ್ಪಲೆಗಿರಿಯ ಗವಿಯಲ್ಲಿ ಯೋಗಿಗಳು ವಾಸವಾಗಿದ್ದ ಬಗ್ಗೆ ಐತಿಹ್ಯಗಳಿವೆ. ಇವರು ಇಲ್ಲಿ ಶಿವ ಮತ್ತು ಶಕ್ತಿಯ ಒಂದು ದೇವಾಲಯವನ್ನು ಸ್ಥಾಪಿಸಿದ್ದಾರಂತೆ. ಆದರೆ ಕಾಲ ಕ್ರಮೇಣ ರಾಜಾಶ್ರಯ ಕೈತಪ್ಪಿ ಈ ಕ್ಷೇತ್ರ ನಾಶವಾಯಿತು. ಆದರೆ ಅವರು ತಮ್ಮ ಅನುಷ್ಠಾನದಿಂದ ನೆಲೆಗೊಳಿಸಿದ್ದ ವಿಶೇಷ ದೈವೀಚೈತನ್ಯ ಮಾತ್ರ ಇಂದಿಗೂ ಇಲ್ಲಿ ಜಾಗೃತಸ್ಥಿತಿಯಲ್ಲಿದೆ.